久別重逢，終於番嚟《叮噹法寶物理原理大解構》系列啦！唔知大家有冇掛住哩個系列呢？雖然小弟其實唔算係叮噹fans，但都等小弟喺度再次同大家探討吓叮噹法寶運作背後（可能）嘅物理原理啦！（PS：再次強調，請記住，係叮噹，唔係多啦A夢，好似係）
進入鏡（入りこみ鏡）
進入鏡，又叫進入鏡子。嚴格講，哩塊鏡其實「唔係一塊鏡」，而係「一道門」。通過哩塊鏡，就可以到達一個左右相反，完全沒有人類嘅異世界。而且無論喺哩個世界中做乜嘢，都唔會反映出喺現實世界度，所以喺入面普通人同「白衫人」一樣，「裝修」係唔需要擔心有黑警介入（不過「宇宙級法律」國安法喺入面仍然適用，好似係）。
接近一模一樣，但左右相反嘅世界存唔存在？
喺討論哩個法寶有冇可能實現到，或背後運用咗乜嘢物理機制之前，我哋首先要了解一下同現實世界接近一模一樣，但左右相反嘅鏡像異世界，物理學上究竟存唔存在。簡單講，即係鏡入面嘅鏡像世界，其實會唔會有可能違反咗某啲物理定律呢？
左右其實係絕對㗎！
透過日常生活嘅經驗，大家應該都會認為左同右同上下前後一樣，係一個相對概念嚟。鏡像世界除左啲文字會左右掉轉，睇落有啲奇怪之外，基本上你係唔會覺得鏡入面嘅世界係「異世界」，自然界嘅法則好似一樣適用，同現實世界冇分別。不過事實上又係唔係真係咁呢？
哩個觀念其實係錯㗎！事實上，左同右其實係絕對，係有方法可以完全客觀咁出嚟。雖然自然界絕大部分已知嘅物理法則，同基本力都係左右對稱，亦即物理學中嘅所講嘅宇稱守恆，但其實當中有一種基本力—弱作用力係左右唔對稱。哩個就係物理學中著名嘅宇稱不守恆發現，小弟之前都寫過拙文講解過[1]。
因為宇稱不守恆（parity violation），所以從理論上，係冇可能建構出一個完全一模一樣，但左右相反嘅鏡像異世界出嚟。不過叮噹嘅鏡像異世界又唔係完全一模一樣，至少漫畫世界強調入面係冇人存在。
進入鏡「理論上」可能嘅運作原理
好啦，番到正題，究竟進入鏡物理上係點運作嘅呢？首先物理上，係冇可能可以輕易瞬間建構出一異空間，更加唔好講建構鏡像世界過程會有宇稱不守恆哩個限制。因為咁，小弟大膽猜測，進入鏡其實應該係類似隨意門或如果電話亭，嗰類穿梭時空或平行宇宙嘅工具，佢「唔係一塊鏡」，而係「一道門」，係通往一個同我哋宇宙宇稱相反嘅平行宇宙嘅入口嚟。
雖然我哋身處嘅宇宙而家係宇稱不守恆，有CP破缺（CP violation），但理論物理學家一般相信喺超高能量（遠超出人類實驗現時已探知嘅能量範圍）嘅物理世界，例如太初宇宙嘅環境，宇稱其實本身係守恆。宇稱不守恆好大機會只係自發對稱破缺（spontaneous symmetry breaking）嘅結果，就好似基本粒子嘅質量其實係透過希格斯機制（Higgs mechanism）而獲得咁。其他自發對稱破缺嘅例子其實仲有唔少，好似日常生活上同下之所以有分別，其實係因為我哋身處喺地球或行星，哩個上下對稱破缺嘅解上面，事實上重力理論本身係冇上下之分。
理論上，雖然我哋仲未知導致宇稱不守恆或CP破缺背後機制點嚟，但一般嚟講，我哋冇理由認為我哋而家身處嘅宇宙，係自發對稱破缺過程嘅唯一解。所以宇宙某一個地方存在一個唔同、宇稱相反嘅真空物理態，唔係一件完全冇可能嘅事。
不過好似上一節所講，事實上左同右係分別。而且生物學上，雖然外觀上或者左右對稱，但其實地球上所有嘅生物背後都隱含著掌性（chirality），入面所有胺基酸都係左向，而血糖就係右向。所以理論上，一個宇稱相反嘅世界，係唔會只係左右掉轉，而其他嘢完全一模一樣。或者哩個就係點解叮噹漫畫鏡像世界，入面冇人（同其他生物？）存在嘅原因啩！
所以其實叮噹嘅漫畫世界某程度上都幾「合乎科學」，而且作者甚至有宇稱不守恆、生物掌性（homochirality）哩個認知，好似係。
今次講到哩度，下次再講。
延伸閱讀：
[2] 《掌性(chirality)》，胡婷嘉著 https://highscope.ch.ntu.edu.tw/wordpress/?p=57245《Biological Homochirality: One of Life’s Greatest Mysteries》（英文）by Sebastian Wellford https://medium.com/a-spoonful-of-sugar/biological-homochirality-one-of-lifes-greatest-mysteries-2031f4700c4b
[3] 《How to Tell Matter From Antimatter | CP Violation & The Ozma Problem》 by minutephysics
論盡物理宇宙 - 某80後物理學博士的科普blog 
.jpg){kind=link}
