Tag Archives: 哥本哈根詮釋(Copenhagen interpretation)

叮噹法寶物理原理大解構 [四] (The Physics Behind Doraemon Gadgets IV)

Posted on by
1

正所謂「一日不見，如隔三秋」，何況係一季？等咗咁耐，終於又嚟到《叮噹法寶物理原理大解構》系列嘅時候啦！今次繼續同大家探討叮噹法寶嘅背後物理原理同喺現實世界入面嘅可行性 [yeah]

如果電話亭 （もしもボックス）

 

(圖片來源：https://chinesedora.com)

如果電話亭，又名假如/如意/XX…電話亭，名列日本人叮噹最受歡迎法寶第八名。著名常見法寶之一，喺《大雄的魔界大冒險》等大長篇都有登場，但個電話亭喺《大雄的魔界大冒險》中被媽媽抌咗之後，漫畫中就再冇出場過，好似係。

呢個電話亭係一種類似實驗室(？)嘅道具，俾你體驗吓任何FF嘅情況甚至係幻想中嘅世界。只要走入個電話亭對住聽筒講「如果xxx」，電話亭就會帶用家去相應嘅平行世界。根據網上記載(非官方？)佢設定上裝有平行空間探測天線、次元記憶發生裝置、空間移動發生引擎、能量儲藏裝置同空間防重裝置。而且入面嘅電話除左裝有撥號器同聽筒，仲裝有平行計算機。(PS：全部都係唔太清楚係乜但聽落幾有計嘅配件，好似係[sosad])

一件咁神奇、頂級、超卓嘅道具，喺現實物理學世界究竟可唔可行呢？平行世界又存唔存在呢？以下等小弟幫大家解答吓啦！

平行宇宙存唔存在？(Do parallel universes exist? )

012

(取自叮噹單行本32卷第二話)

要討論如果電話亭可唔可行，首先梗係要搞清楚平行世界現實中存唔存在先啦！平行世界(parallel universes)，一個科幻小說老是常出現嘅元素，通常意指一個平行於「現實」世界，同我地身處嘅宇宙冇關嘅世界，入面嘅歷史、物理定律可以好唔同。換個簡單啲嘅講法，某程度上可以話同一個FF出嚟嘅世界冇分別。

作為一個「認字特警」，從嚴謹字面定義上講，叫得「平行」，即係各平行宇宙間喺整個時空任何時刻都冇交匯點。如果有方法(不論自然發生定人為）可以喺呢啲宇宙間穿梭，咁亦即係宇宙間出現交匯點，唔再係平行啦！所以物理學界其實係唔會用平行宇宙呢個詞彙，而會用多重宇宙(multiverse)去形容呢啲宇宙或者世界。喺數學同科學，尤其物理入面，釐清定義係好重要，始終數學家同科學家唔同XX政府官員，佢地嘅龍門係唔識郁架，好似係 [sosad] 下次同物理學家(尤其小弟)討論時記得改口用偽‧平行宇宙或者多重宇宙啦 [slick]

真‧平行宇宙存唔存在呢個係純哲學問題，不過叮噹同其他科幻小說講嘅好明顯係偽‧平行宇宙，探討呢類多重宇宙喺真實世界存在嘅可能性仲算係物理學上嘅範疇。

量子力學未解之謎—量子力學正確嘅詮釋 （The missing mysterious bits in quantum mechanics, the interpretation of quantum mechanics)

喺探討多重宇宙可能性前，小弟想「離題」回帶講返少少量子力學(quantum mechanics)先 (兩者當然有關係啦，請耐心睇落去 [slick])。

量子力學發表咗接近一個世紀，雖然已經通過咗好多嚴格嘅實驗驗證，好似小弟之前提過著名嘅雙縫實驗(double-slits experiment)同貝爾不等式實驗(Bell’s inequality experiment) 咁（除咗嗰啲XX偽科學如量子磁鐵同量子傳心外，因為嗰啲根本同量子力學冇關），理論根基已經很難動搖，但好老實講，物理學家咁多年都仲未搞清楚佢真正嘅本質，即係究竟怎樣詮釋呢套咁「違反常識」嘅理論先啱。

量子力學理論入面最令物理學家頭痛同費解嘅要數波函數坍塌(wavefunction collapse)—一個幾詭異而且成日被外行人誤解嘅現象。

(credit: cartoonstock.com)

波函數(wavefunction)係量子力學入面嘅一樣「工具」，用嚟描述粒子/波喺量子世界嘅量子形態，某程度上你可以將睇成喺普通經典牛頓力學入面好似位置、動量呢啲用嚟描述粒子形態嘅物理數值。佢會根據薜丁格方程式(Schrodinger’s equation)嘅設定隨時間演化。

點解要括住「工具」？因為波函數同大家熟識嘅經典物理學中描述系統形態嘅物理量有一點好唔同，佢唔係直接可以被觀察或測量到嘅嘢。佢其實係一個含虛數嘅函數，而佢絕對值(modulus)嘅平方代表住個量子系統喺某形態出現嘅機率密度(probability density)。呢啲經運算後得出嚟嘅機率密度先係可以直接同實驗對比嘅嘢。所以究竟波函數係真實存在，本身有物理意義嘅嘢定真係只係物理學家為咗運算而發明嘅數學工具呢個問題至今仍然未有定論 [banghead]  對於呢個問題，小弟會變身「騎牆派」食花生，持中立態度，始終呢個問題某程度上已經涉及哲學層面，好似係。

好啦，講返波函數坍塌。呢個現象係指當一個處於態疊加狀態 (即同一時間係到彈出彈入) 嘅量子系統喺被「觀察」後，佢嘅形態就會被固定落嚟，就算之後你再「觀察」佢幾多次結果都唔會再變，雖然喺「觀察」前仲喺態疊加狀態觀察結果係講機會率，有唔同可能性。小弟特別括住「觀察」係因為物理學家講嘅「觀察」其實係指一個量子系統同一個宏觀世界系統間發生相互作用，而唔係真係指需要一個人或有意識嘅物種去睇個系統 [banghead] 另外上面亦假設咗個量子系統喺被「觀察」後再冇其他相互作用影響佢。

波函數坍塌喺量子力學入面就好似人大釋法、搬龍門咁(#kill #kill)，係額外加上去嘅設定，本身理論好似薜丁格方程式等都冇描述有呢個現象。物理學家仲研究o緊呢個現象詳細理論上係點嚟，係量子力學入面尚未有完整定論嘅最大謎團之一。點樣解釋呢個現象亦同量子力學嘅詮釋有關，而詮釋量子力學某程度上就令物理學家開始認真探討多重宇宙存唔存在呢個問題。

現時比較主流嘅量子力學詮釋有哥本哈根詮譯(Copenhagen interpretation) 同多重世界詮譯 (many worlds interpretation)。哥本哈根詮釋之所以以哥本哈根命名，係因為呢套詮釋係上世紀量子力學理論建立初期時，最先由量子力學之父(s)波爾(Niels Bohr)同海森堡(Werner Heisenberg)喺哥本哈根一齊研究量子力學時提出。呢套詮釋亦係歷史最悠久*，教科書最常用嘅一套詮釋。佢指量子系統喺被「觀察」時個系統嘅形態都會突然由態疊加狀態隨機率變成其中入面嘅一個形態並固定落嚟，只有嗰個剩番嘅固定形態係真實存在，另外嗰啲之前同樣喺態疊加狀態入面嘅形態會被消滅從此消失。至於點解係咁就暫時仲未有一套詳細合理嘅解釋，雖然可能係同量子退相干 (quantum decoherence) 有關。

*不過請記住科學唔係政治，唔係投票，歷史最悠久唔代表一定啱

 

另外一套都屬主流嘅多重世界詮釋就係由艾華雷特 (Hugh Everett)上世紀1957年提出。唔同哥本哈根詮釋，呢套詮釋話理論公式就係一切，冇需要「搬龍門」喺薜丁格方程式外額外強加一套定律入去。每次「觀察」處於態疊加狀態嘅量子系統時，世界只係根據可能性分裂出好多唔同嘅世界，而觀察者只係被帶往其中一個分裂出嚟嘅世界而已。如果量子力學真係好似呢套詮釋咁運作，多重世界就可能真實存在，如果電話亭同叮噹嘅(偽)平行世界論或者真係有機會係啱同實現到啦 #love#

或者你會問突然根據可能性多咗(無限)咁多個世界出嚟，咁多重世界唔係違反咗能量守恆定律咩？多重世界詮釋其實係話呢啲多出嚟嘅世界係喺原先嘅世界分裂得出嚟，唔係唔知係邊度突然變啲世界出嚟。另外守恆定律喺物理學入面從來都唔係最根本嘅真理，理論同公式嘅數學對稱性先係。能量守恆定律其實係由物理學理論喺時間軸上嘅對稱性推論出嚟，而量子力學入面「觀察」呢個操作違反咗時間對稱性，所以亦即會違反能量守恆定律，世界變少(或多)咗嘢其實係冇問題架！

詳細有關量子力學嘅詮釋討論可以睇下面短片(英文)

https://www.youtube.com/watch?v=ZacggH9wB7Y

另外物理學上其實對多重宇宙都有好多唔同嘅演繹同定義，甚至可以細分成幾種唔同級別。不過詳細有關多重宇宙嘅深入討論留番下次有機會先再講啦 [slick]

 

最後送首歌畀大家，祝大家中秋節快樂！！

https://www.youtube.com/watch?v=Pb8PyFxwmsA

今次講住咁多先，下回待續 #bye#

 

引伸延讀︰

[1] https://godfreyleungcosmo.wordpress.com/2014/09/10/%E9%87%8F%E5%AD%90%E5%8A%9B%E5%AD%B8%EF%BC%8C%E7%9C%9F%E5%AF%A6%E5%AD%98%E5%9C%A8%E7%9A%84%E7%95%B0%E4%B8%96%E7%95%8Cquantum-mechanics-a-weird-world-that-exists-in-reality/

[2] https://godfreyleungcosmo.wordpress.com/2017/02/07/%E6%89%80%E6%9C%89%E5%98%A2%E9%83%BD%E4%BF%82%E9%87%8F%E5%AD%90%E5%8A%9B%E5%AD%B8%E7%B3%BB%E5%88%97-%E5%8F%88%E4%BF%82%E7%B2%92%E5%AD%90%E5%8F%88%E4%BF%82%E6%B3%A2%E5%8D%B3%E4%BF%82%E9%BB%9E-what/

[3] https://www.youtube.com/watch?v=Ywn2Lz5zmYg

[所有嘢都係量子系列] 超遠距離嘅鬼魅效應？愛因斯坦都有錯嘅時候…(Spooky Action at a Distance? Einstein can also be Wrong Sometimes…)

Posted on by
1

愛因斯坦（Albert Einstein）最為人所熟識嘅唔使講梗係佢嘅相對論啦！但其實佢對現代物理學另一個重要基本支柱—量子力學（quantum mechanics）嘅貢獻都唔少架！佢攞諾貝爾獎都係因為佢關於光電效應（photoelectric effect）嘅研究，相對論反而因為走得太前，太「極端」[adore] [adore]，當時尚未有太多嚴謹實驗證明個理論真確(尤其廣義相對論，當中嘅重力波仲要到舊年先被LIGO證實)，又或者基於學術界嘅黑暗同其他政治上嘅考慮所以冇獲獎[1]。

雖然因為量子力學攞到諾貝爾獎，但愛因斯坦一生都對量子力學抱有一定懷疑，認為佢係一個未完善唔完整嘅理論。始終一直以來物理學界都相信世界係確定性（deterministic）嘅，即使愛因斯坦嘅相對論都係，突然間要接受一個完全顛覆哩個傳統概念嘅理論的確唔易。始終佢唔係淨係FF嘅 X登仔，佢係一個科學家，相信「超乎尋常的宣稱，需要超乎尋常的証據。」“Extraordinary claims require extraordinary evidence” — 卡爾薩根(Carl Sagan)/特魯西(Marcello Truzzi)/拉普拉斯(Pierre Simon de Laplace)。從佢嘅名言「上帝不會擲骰仔」*可以睇出啲端倪。

*愛因斯坦句名言只係比喻，唔係不代表佢真係信「上帝」存在

量子力學入面其中一個怪異現象—量子糾纏（quantum entanglement），亦令愛因斯坦好困擾。佢仲同其他後輩發表論文提出流傳後世嘅愛因斯坦–普度斯基–羅森悖論（Einstein-Podolsky-Rosen paradox, EPR paradox）^，質疑哥本哈根詮釋（Copenhagen interpretation）。論文入面佢提出量子力學相關嘅思想實驗，亦即後來薛丁格（Erwin Schrödinger）命名嘅量子糾纏，藉此指出哩個現象有如超遠距離嘅鬼魅效應 (spooky action at a distance)。由於有可能涉及超光速訊息傳遞，同佢嘅相對論有矛盾，所以佢認為量子力學喺詮釋同理論上有「缺憾」/爭咁啲嘢，有隱藏變量（hidden variables）。論文洐生出對量子力學嘅爭論之後仲喺物理學界持續咗幾十年。

1689aa71fabdb9d768fd03826aa50aa8

Einstein facepalm

愛因斯坦雖然係屈機天才，不過佢哩個睇法最終喺佢死後被人推翻。量子糾纏其實唔涉及超光速訊息傳遞，隱藏變量理論（hidden variable theory）亦同後來嘅實驗結果有出入。[offtopic] 不過唔知點解好多外行人/初學者仲認為物理學界對EPR悖論尚未有解答或者藉此推論量子糾纏=瞬間超光速效應 [ban] [ban] [sosad] [sosad]

^哩個普度斯基唔係踢過阿仙奴、拜仁嗰位德國球星 :O)

乜嘢係量子糾纏？(What is quantum entanglement?)

要理解愛因斯坦點解咁諗同點樣解答佢嗰EPR 悖論，首先要知道乜嘢係量子糾纏。用簡單例子概括嘅話，量子糾纏係指兩粒粒子經過某段時間一齊時嘅相互作用後，就算之後分開咗幾遠，佢地最後被觀察出嘅形態雖然根據量子力學係隨機，但兩者間永遠都有關聯。簡單描述可以睇下面段片(英文)

https://www.youtube.com/watch?v=DbbWx2COU0E

試想像一個會釋放出兩粒子嘅系統，好似一粒亞原子粒子(subatomic particle)衰變咁。根據物理模型數學上嘅對稱性，過程中要遵守守恆定律，所以衰變出嚟嘅粒子嘅狀態需合乎守恆定律存在住關聯。簡單通常講嘅例子有自旋spin為0，好似pion嘅中性粒子當佢衰變出一粒電子同正電子嗰情況咁。自旋同為1/2嘅電子同正電子佢地自旋嘅形態有上旋|↑> 同下旋|↓> 兩種可能性。假設粒電子同正電子衰變出嚟後各自高速向相反方向行而且冇再接觸過，然後我地各自分開觀察佢地。雖然量子力學話俾我地知各自睇粒電子同正電子量度出上旋|↑> 同下旋|↓>嘅可能性均為50%，但因為角動量守恆，如果粒電子處於上旋|↑>嘅話粒正電子就必然處於下旋|↓>，相反亦然。哩個現象後來被稱為量子糾纏。

哩個量子糾纏現象令愛因斯坦「好唔舒服」，因為驟眼睇兩粒粒子間好似有瞬間作用力，而且仲係無論隔幾遠都一樣，完全「違反」佢一直相信同畢生嘅傑作相對論對3＋1時空結構嘅前設。不過佢嘅睇法最後被證實係錯嘅…

貝爾不等式，有關聯唔等於必然有因果關係 (Bell’s inequality, correlation does not necessarily imply causation)

bells_theorem

(曲）有關量子糾纏「真正」嘅貝爾定理 by xkcd.com XD

要解答愛因斯坦嘅EPR悖論，首先要釐清一啲錯誤嘅概念。試想像下面個例子：夏天時比其他季節多咗好多人食雪糕；夏天同時沙灘又多咗好多鯊魚襲擊人嘅事件。咁係唔係由此我地可以推斷食雪糕會導致鯊魚襲擊人？梗係唔係啦 [sosad] (除非條鯊魚係《銀魂》嗰阿銀扮嘅？[sosad])

記住結果喺統計上有關聯唔等於事件間必然有因果關係存在。哩個係啲人成日犯嘅謬誤，就算喺大學學術界入面都有唔少 [sosad] 經典例子就好似舊年年尾中大個食早餐高分啲個研究咁[ban][ban] [2]

為咗解決量子力學究竟係確定性定係隨機性，需唔需要隱藏變量哩啲一直困擾物理學家嘅問題，物理學家貝爾（John Bell）喺愛因斯坦死後嘅1964年諗到一個聰明嘅方法點樣用實驗去解答呢啲問題。嗰方法被稱為貝爾不等式/貝爾定律(Bell’s inequality/Bell’s theorem)，相關實驗其後相繼喺七十、八十年代被實現出嚟。結果最後證實量子力學根本上真係隨機，量子糾纏o緊嘅粒子只係有關聯冇相互作用，中間唔存在瞬間超光速效應，隱藏變量理論係錯嘅。

簡單嘅量子糾纏態，好似上一段電子同正電子個例子，比喻嚟講就好似擲銀仔時銀仔嘅正反兩面咁。正反兩面冇錯係有統計學上嘅關聯，擲銀仔時知道一面係乜就會即刻知道埋另一面應該係乜，但咁唔代表銀仔嘅一面瞬間用咗某種方法話畀另一面知要係乜。擲銀仔如果分開正反兩面嘅結果獨立睇，你係唔會能夠分辦到結果係擲2個硬幣時，兩個硬幣嘅正面定係同一硬幣嘅正反兩面，換言之過程中間其實並冇訊息傳遞過。事實係只有當你將量子糾纏兩面嘅測量結果放埋一齊比較時先會分到，而要去比較就一定需要透過某種物理手段傳遞訊息，你咁做就會受光速限制。另外一經測量，當量子糾纏態同周圍環境發生相互作用之後，糾纏狀態就會被破壞，粒子間嘅關聯效應從此消失，你唔可以再透過測量一面去「瞬間改變」另一面嘅結果。詳細嘅講解可以睇下面《Looking Glass Universe》嘅短片（英文）：

https://www.youtube.com/watch?v=0xI2oNEc1Sw&t=5s

量子糾纏推翻嘅其實係定域性（locality），而唔係光速為訊息傳遞速度上限嘅時空因果關係結構。所謂定域性係指：一個相互作用的」嘅物理過程，如果佢嘅進行淨係同當時當地嘅時空變數有關，咁就係定域嘅物理過程，表明佢不單只係一個時空嘅過程，而且係一個集合著局域作用嘅定域過程；而非定域性就指物理過程可以同另一點，當地以外嘅時空變數有關。非定域性效應測量得出嘅結果係根據波涵數推算出嘅機率，完全隨機嘅；而超光速瞬間相互效應或隱藏變量理論就可以隨意改變。貝爾不等式證明咗前者先係量子糾纏效應正確嘅解釋&。詳細關於貝爾不等式同相關實驗嘅解釋可以睇下面《Veritasium》嘅短片：

https://youtu.be/kGRyHi72qvk (中文字幕）

& 非定域性嘅隱藏變量理論其實仲可以乎合貝爾不等式嘅，例如導航波理論（pilot wave theory）。不過哩啲相關理論喺學術界算唔上主流

另外如果大家對狹義相對論有啲認識同睇過小弟之前寫嘅劣拙文，應該記得「同時」呢個概念根本就唔存在，唔同觀察者對同時嘅定義都可以唔同，所以根本唔存在瞬間作用呢樣嘢。而且雖然喺A粒子嘅角度睇好似量度A時會「瞬間」決定咗B粒子嘅形態，但換個角度喺B粒子睇你一樣可以話量度B「瞬間」決定咗A嘅形態。換句話即係其實兩個講法都講唔通，事實係A同B粒子間有統計學上嘅關聯但冇因果關係/相互作用。正確啲講，糾纏中嘅一對粒子嘅兩個量子形態其實係應該睇做「一個」單一嘅量子形態。總結一句，愛因斯坦都有錯嘅時候，量子糾纏=/=遠距離超光速瞬間效應，量子糾纏=/=遠距離超光速瞬間效應，量子糾纏=/=遠距離超光速瞬間效應。(好重要所以要講三次 XD XD)

[offtopic] 數學家約翰·康威(John Conway)近年亦用比較嚴謹嘅數學邏輯發表咗自由意志理論(free will theorem)去解釋隱藏變量理論根本上同量子力學有抵觸

最後送上一條幾得意嘅講霍金同飾演蟻人的保羅．路德 （Paul Rudd）捉量子西洋棋嘅短片 =)

https://youtu.be/Hi0BzqV_b44

今次講住咁多先，下次再談

引申延讀：

[1]《Why Einstein never received a Nobel prize for relativity》by Stuart Clark, The Guardian,

[2]《垃圾科學：淺談食早餐高分研究》、《垃圾科學：食早餐會高分啲？（二）》，立場新聞

[3] 《量子糾纏的故事：從惡夢到美夢》，講者：臺師大物理學系 林豐利教授，撰文：高英哲

[4] 《你抓得到我嗎–非0非1的量子資訊》，臺灣成功大學物理學系 張為民著

[5]《量子故事会（14）爱因斯坦为啥不信量子力学？EPR佯谬说了啥？》、《量子故事会（16）贝尔不等式啥意思？也许你还不了解这个世界》，by 媽咪說MommyTalk （普通話）

白話文版：

https://medium.com/@godfrey.leung.cosmo/%E8%B6%85%E9%81%A0%E8%B7%9D%E9%9B%A2%E7%9A%84%E9%AC%BC%E9%AD%85%E6%95%88%E6%87%89-%E6%84%9B%E5%9B%A0%E6%96%AF%E5%9D%A6%E9%83%BD%E6%9C%89%E9%8C%AF%E7%9A%84%E6%99%82%E5%80%99-98dc5ab8e567

View at Medium.com

量子力學，真實存在的異世界(Quantum Mechanics, a weird world that exists in reality)

Posted on by
1

833b3d4acb911e684312a658c1836d1e

小時候，有沒有FF過置身科幻、漫畫世界中，如龍珠中悟空般隨意瞬間轉移，或置身叮噹中如果電話亭和電影《連鎖蝶變》(The Butterfly Effect)中既平行世界﹖其實各位不用FF，因為我們的現實世界的確存在著如此「違反常理」的異世界。

淺談量子力學(Quantum Mechanics)

相信不少人也聽說過量子力學(Quantum Mechanics)，但究竟甚麼是量子力學﹖對一般大多數人而言，量子力學的確係一個難以理解既範疇，就好似大陸、特區政府和「建制派」官員既言論一樣，令人O嘴同汗顏… (當然不同的係量子力學絕對不是歪理 😉 ) 即使如愛因斯坦也不相信量子力學，從他的名言「上帝不會擲骰子」(God does not play dice）可到睇到。有點諷刺嘅係他得到嘅Nobel Prize卻係因為光電效應(photoelectric effect)，一個確立了波粒二象性概念(wave particle duality)的重要實驗，對量子力學的發現有重大影響。

量子力學難以理解這大多是因為所有我們中學或平常生活接觸到的物理、情況也是經典物理學(Classical Physics)，亦是確定性的(deterministic)。而量子力學同經典物理學最大分別就是在於量子力學是概率性的(Probabilistic)，亦即好似擲骰子咁，同一實驗結果不是絕對而是根據機會率。(但這絕不是指量子力學係完全隨機、不可預測的)

「彈出彈入喎，打我吖笨」，薛丁格猫(Schrodinger’s Cat)

要理解量子力學，我們首先要認識甚麼是態疊加原理(superposition principle)。態疊加(superposition)，指的是一個系統在量子世界入面是可以同時以幾種不同既形態出現。簡單講就好似波(wave)一樣，不同既形態係可以相加組成一個態疊加既形態(superposition state)。用0同1表示，即係一個系統在量子世界可以同時是0又是1，好似禁

在量子力學我們統稱這些形態做波函數(wavefunction)。

當然這對於身處宏觀經典物理學世界既我們是難以想像既，亦帶來邏輯詮釋上既問題。當中最經典的例子莫過於薛丁格猫(Schrodinger’s Cat)這個假想實驗。根據哥本哈根詮釋(Copenhagen interpretation)，任何隔離既系統係量子世界都是處於態疊加既形態(superposition state)。只有當我們測量觀察這個系統的時候，相互作用才會將形態確立係我們最終在宏觀世界觀察到既狀態導致波函數坍縮(wavefunction collapse)。而之後我們無論再怎樣測量觀察個系統結果都唔會變。另外一種就是多世界詮釋(many worlds interpretation)，即係假定我們世界存在無數個平行世界，每次測量觀察只是將我們帶去不同平行時空。

好啦，薛丁格之猫(Schrodinger’s Cat)是指甚麼﹖薛定諤猫這個假想實驗講既就是假如有一隻猫，牠身處一間密室中，密室中有一瓶毒藥，而這瓶毒藥有一半機會放出有害氣體一半機會乜都唔會發生。咁究竟係我們打開門睇之前，隻猫是生定死呢﹖定係牠是處於superposition，即是生同時又是死呢﹖呢個「哲學」問題到而家都仲未有答案…

PS: 大家看完都仲唔明係正常的，因為即使是費曼(Richard Feymann)都講過冇人真的明白量子力學（“I think I can safely say that nobody understands quantum mechanics”），我這個small potato又點可能明白兼解釋得清楚呢﹖(不過我都歡迎comments同問題)

最後，祝大家中秋節快樂，下回待續。

中文「非母語」版：
https://medium.com/@godfrey.leung.cosmo/%E9%87%8F%E5%AD%90%E5%8A%9B%E5%AD%B8-%E7%9C%9F%E5%AF%A6%E5%AD%98%E5%9C%A8%E7%9A%84%E7%95%B0%E4%B8%96%E7%95%8C-6aa7ccdee316

英文版：
https://medium.com/@godfrey.leung.cosmo/qm-series-i-quantum-mechanics-a-weird-world-that-exists-in-reality-f6c3bf58cd17