讀PhD 博士=中伏? 對最近啲人不斷勸阻、「誇大」讀博士嘅辛酸有感(PhD is a trap?)

PhD,全寫係Doctor of Philosophy (唔係Pizza Hut Delivery、Pretty Huge Dick XD 但 Permanent Head Damage係真嘅,好似係),意指「哲學」博士,包括所有學科。原意係因為所有嘢、學科去到最深入前沿嘅境界時其實都係哲學(好似係)。

香港人作為純粹嘅經濟動物,不嬲都唔重視學術研究,會考慮讀博士嘅更加少之又少 =`( 但對於最近好多人以過來人身份不斷強調讀博士嘅痛苦、難處,媒體又不斷渲染博士生=修練「葵花寶典」嘅宅男/女、活喺象牙塔搵唔到食,小弟覺得太嘩眾取寵,想寫番啲個人睇法。

讀博士= 做研究、番工,唔係讀書

phd030110s

http://phdcomics.com/comics/archive.php?comicid=1286

一般人,尤其香港人,對讀博士最大誤解係當咗佢係好似中小學、大學讀學士咁,係上堂學知識,只係啲課程深啲 :O)。博士生涯其實上堂學嘢、功課考試最多只係佔一半甚至更少,唔同地區、課程、學科變化仲好大。好似英國、歐洲為例,物理系嘅博士課程大多只係3-4年,而且可能冇定時嘅堂、做卷嗰類考試,一開始已經要做研究工作,邊做邊學。美國(香港都好似係)就可能閒閒地5年以上,頭一兩年都係好似學士、碩士咁做功課、考試、上堂為主。呢個分別係因為英美歐大家大學嘅課程好唔同。英國、歐洲喺學士、碩士嘅時候已經讀得專門、深入啲;香港、美國就講通才,學士課程除左自己嗰科之外仲要讀好多林林總總嘅嘢。

另外歐美兩地博士獎學金、funding嘅系統都好唔同。英國、歐洲好多博士生都係攞full scholarship 獎學金(包生活費)讀嘅,通常攞唔到獎學金嘅係唔會考慮讀嘅。香港、美國就未必有,就算有都未必夠生活,主要靠做tutor教書出糧。*

博士生嘅生活其實似番工多過讀書。小弟為例,做博士嗰時每日嘅生活都係上網睇論文(同BBC/facebook XD),睇吓最近有乜新發現/研究突破,好似文職睇report,銀行、金融工啲人睇住個市咁。而自己研究嘅project就好似做生意、公司project咁,要定時向教授匯報同sell自己「搵客」,即係搵其他人介紹/討論研究內容同開conference present咁。所以個人覺得讀博士時心態上當自己番o緊工就「perfect池」

讀博士只係得痛苦?

近年網上好多人、媒體(好似乜嘢呢個PhD只係我的XX、HK01)好鍾意講讀博士時點辛苦、艱難,畢業之後前途又點「前途黯然」。有人講吓博士生活,畀人知道吓博士課程當中可能遇到嘅難處,制度上可能有咩問題係好事,始終讀博士係一個好特別另類、別人難以理解嘅體驗。但一味講難處、點辛苦又太偏見啦,只會畀人中伏、呻苦嘅感覺同令有意之士卻步。

無錯,讀博士前途未必有保障,但咁唔表示畢業之後一定前途黯然。大學教職、研究所職位的確僧多粥少,呢個係事實,係社會重金融、經濟輕學術嘅結果。問題其實好耐之前自從有博士後呢個「怪胎」出現之後就有,而家博士生畢業好多都未必會留喺學術界。但離開學術界=/=冇前途,亦未必做番自己讀嗰範,好似讀物理、應用數學嘅其實喺金融界投資銀行好搶手。讀博士學到嘅研究技能、soft skills其實好多,閱歷亦比其他人豐富,呢啲都係寶貴嘅財產同搵工時嘅優勢。

phd021717s

http://phdcomics.com/comics.php?f=1924

另外,讀博士時都有好多歡樂時光/好處,好似唔使趕起身番工/成日OT咁 (雖然其實你可能每日24小時都諗o緊你份研究 [sosad])。平時又有好多機會去唔同地方出trip開會(順便旅行 ^3^) ,開會/seminars又可能有free lunch,又可以體驗唔同文化結交唔同地方嘅朋友(博士生/教授好多都係好玩得嘅正常人,唔好FF全部都係匿喺研究所唔social嘅怪人[sosad])。當然最重要嘅係研究過程成功時帶嚟嗰種無可比喻嘅滿足感啦

讀博士前嘅考慮

博士/學術生涯係一個好特別,唔係人人都有嘅人生體驗,某程度上就好似運動員生涯咁。未試過嘅話有時好難知道自己適唔適合同鍾唔鍾意。小弟唔會勸阻人讀博士或者不停呻讀博士嘅苦處,只係想講大家係選擇讀博士前應該先做好心理準備,當中嘅過程同你幻想嘅可能會有好大出入。最理想係喺讀學士時就嘗試喺大學搵吓暑期/短期研究工作體驗吓,報讀之前亦可以搵教授或者博士後吹下水

phd032410s

http://phdcomics.com/comics/archive.php?comicid=1296

另外,點報博士課程都有學問,好似揀大學同教授咁。上面幅圖雖然係搞笑,但博士生同負責佢嘅教授嘅關係其實真係似婚姻關係。好多時讀博士讀得唔開心都係因為揀錯教授同研究部門

*獎學金系統制度上的敘述是從當地學生角度出發,並不適用於國際外地學生。不同大學不同學科亦可以有很大出入

註︰博士生/學術生涯尤如運動員生涯,競爭非常大而且前途未必有保障。本文無意淡化讀博士課程問題遇到的問題或美化博士生活。博士/學術生涯的問題絕對應該嚴謹正視並改善、給予適當支持。本文旨在指出分享經驗、給予建議與旨在令人泄氣是有分別的,後者未必對解決問題有幫助,甚至可能加深外界的誤解

立場新聞書面語版:

https://www.thestandnews.com/cosmos/%E8%AE%80phd-%E5%8D%9A%E5%A3%AB-%E4%B8%AD%E4%BC%8F-%E5%B0%8D%E6%9C%80%E8%BF%91%E4%BA%BA%E5%80%91%E4%B8%8D%E6%96%B7%E5%8B%B8%E9%98%BB-%E8%AA%87%E5%A4%A7-%E8%AE%80%E5%8D%9A%E5%A3%AB%E7%9A%84%E8%BE%9B%E9%85%B8%E6%9C%89%E6%84%9F/

Advertisements

arXiv,物理學術界既「維基百科」/網上圖書館

做物理學學者要整天匿係圖書館睇論文?

究竟做學術研究既平常工作生活係點既呢?大家唔少都幻想做研究既人大概都係毒撚,整天匿係lab,或者係圖書館搵參考書同舊論文。咁現實又係唔係呢?係唔係毒撚呢方面我就唔評論啦,各行各業,各式各樣既人都有。之於第二點,其實自從有左互聯網之後,而家既物理學家、數學家已經唔需要係成日翻開學界既論文月刊搵舊論文、資料,因為有左佢既出現:arXiv。

http://arxiv.org

arXiv,物理學術界既「維基百科」/網上圖書館

arXiv係乜?其實arXiv=archive,中間個X係希臘文chi,就係如字面咁解檔案、資料庫既意思。依個網上資料庫係由物理學家保羅·金斯巴格(Paul Ginsparg)係1991年建立,網站server由康乃爾大學(Cornell University)管理。

呢個資料庫收集左差唔多所有自90年代開始已經係期刊發表既論文同冇/或者未發表既論文預印本(preprint),甚至連課堂筆記、參考書都有。而家文章既數目已經過左一百萬大關,範疇仲涉及埋統計學、電腦科學。小弟每天返office第一件事就係上arXiv睇下有乜野新論文。 雖然放上arXiv既文章冇經過同行評審(peer review),但大部份放上去既文章基本上都有學者簡單檢閱吓,睇吓有冇離題同合唔合邏輯,更重要係睇吓有冇抄襲。arXiv既出現大大方便左物理學家、數學家,加快左資訊既流通,學者之間衍生出更多既合作機會。佢既出現仲開創左開放獲取(open access)運動,令平民大眾更加容易接觸到學術論文同最新既科研發展。對科研有興趣既巴打無聊可以上去睇下(PS:唔保證睇得明)。

偽arXiv,物理學既「墳場新聞」/urban dictionary

理論上所有人都可以放論文上去arXiv,但為左保障論文質素,arXiv採用左一套「認證」系統。學術界既作者通常會自動得到認證,民間學者既話就通常要先得到來自另一位具認證資格者的認可。不過學術研究唔係大學、研究所既專利,一般既平民百姓當然都可以自行參與,尤其唔需要金錢投資既純理論FF研究。所以有D科學家就另起爐灶,開左一個唔使認證既偽arXiv叫viXra,不過質素當然就冇保證啦!

Open Access取代科普?

雖然話arXiv呢類open access既檔案庫、論文月刊普通人可以隨意閱讀,令大眾接觸到最新既科研發展,但佢地絕對取代唔到科普著作。唔好話一個唔係學術界既普通人,就算係學者有時都未必睇得明D論文啦(small potato既小弟更加唔使講)。所以科普仍然係好重要,亦係小弟寫呢個blog既原因 :)

遊戲挑戰,究竟你可唔可以憑論文既題目分出邊篇物理學論文係真係出自arXiv,邊篇論文其實係電腦隨機整出黎既假論文呢? http://snarxiv.org/vs-arxiv/

利申:學政府同某D知名人仕話齋,真普選同「假」普選我就唔識「分」啦。但估唔到就算我係學界出身,都只佔岩60﹣70﹪,真係sosad...

更高難度挑戰:經常有獨特見解、萬能既高登仔,你可唔可以將你既理論整理好寫成論文,係arXiv發表呢?

題外話

PS: 大家仲記唔記得上年三月好多人討論,BICEP2發現原初引力波既新聞呢?當時D新聞、物理學家仲好興高采烈咁話終於證實左相對論同宇宙暴脹論(cosmic inflation),甚至開始討論邊個會因為咁攞諾貝爾物理學獎。唔記得可以睇番 https://godfreyleungcosmo.wordpress.com/2014/08/19/old-news-is-so-exciting/ 可惜一年過左既今日,經過另一個宇宙微波背景(CMB)實驗普朗克衛星(Planck satellite)既反覆驗證後,已經證實上次結果只係誤測,低估左星系既干擾。冇證據顯示觀測結果係黎自早期既宇宙。今次結果體現左科學反覆驗證既重要性,亦都提醒我地唔好跟車太貼,尤其傳媒。(外國媒體其實都有報導今次結果,不過香港傳媒好似連提都冇提sosad...可能佢地好似CCTVB咁,忙緊「研究」快過光速三倍既理論啦 :O) ) https://www.facebook.com/wasyoku.celestial/videos/862952707073224/?pnref=story

有關普朗克衛星最新實驗結果既新聞: http://m.digital.sina.com.hk/news/article/4296186/4083/20150203

http://www.bbc.com/news/science-environment-31058529