[我討厭政治(?)]淺談小弟對香港人政治觀念嘅睇法

有追開小弟blog同page嘅,或者會察覺到小弟唔少時候都會借講解物理學,去暗諷一啲社會現象或表達一啲個人對政治嘅睇法。之但係小弟開blog嘅原因,同想寫嘅主要係科普,所以一向都避免喧賓奪主,寫太多政治嘢。

不過有見香港嘅情況變得愈嚟愈差,問題日益嚴重,所以今次又破例一次,唔講物理或數學,想開post講政治。


「我討厭政治」、「唔好政治化」嘅主流思想

喺香港,討論話題,每當有人講及帶有政治觀點嘅時候,好多時會聽到人回「xx還xx,政治還政治」、「我討厭政治」、「請唔好政治化」,尤其係一啲睇嚟同政治好似冇直接關係嘅話題。當然某啲人(尤其強國同港共)未必真係咁睇,呢幾句可能只係因為知道自己理虧,用嚟轉移話題嘅藉口嚟。不過唔少人似乎係真心咁諗,認為政治係一種「興趣」嚟,可以獨立分割出嚟討論嘅嘢嚟。

後者呢種睇法,喺年長一輩嘅香港人係主流,可能因為好多人本身就係為咗逃避政治逼害而嚟香港。小弟屋企雖然唔係呢類「新香港人」,但可能因為耳濡目染,以前都係真心咁諗,始終自己本身就唔鍾意權力鬥爭同爭辯,亦清楚政治世界嘅黑暗面。

不過當人見識多咗,見住香港「被逼政治化」,認識多咗乜嘢先係政治後,就發覺呢種睇法其實幾有問題,而呢個某程度上亦係點解香港今時今日搞成咁嘅原因。


關心政治其實應該係一種責任

“The worst illiterate is the political illiterate, he doesn’t hear, doesn’t speak, nor participates in the political events. He doesn’t know the cost of life, the price of the bean, of the fish, of the flour, of the rent, of the shoes and of the medicine, all depends on politicaldecisions.” – by Bertolt Brecht (好似係)

點解小弟會認為呢種「討厭/唔好政治化」思想會係一個問題?因為呢種思想背後其實代表著政治冷感,某程度上係一種唔負責任嘅表現嚟。

政治,其實就係生活,係日常生活無可分割、避免唔到嘅一部分。只要你身處喺人類社會,簡單到好似食餐飯、搭車等,背後本身就同一堆政治決定息息相關。人同人相處本身就係一種政治,只要有人類嘅地方,政治就唔會完全消失同避免到。

簡單例子,喺公司或屋企,好似邊個話事、討論某件事點做、日常運作應該係點,其實本身都係一種政治。所以避開唔討論,其實等於將自己個話言權放棄,某程度上即係由得人哋「幫」你做決定,決定你生活喺一個點嘅社會、過咩生活,咁唔係對自己唔負責嘅表現咩?

小弟政治啟蒙小說銀河英雄傳說,個人幾鍾意入面主角嘅一句:

「專制君主的德政這一個玩意兒對於人類的政治意識來說,應該是一種最為甘美的麻醉藥吧。不用參與、不用發言,甚至也不用思考,政治就可以正常地運作,人們也可以享受和平與繁榮的話,有誰會想去參與麻煩的政治呢?能夠這樣的話固然很好,但是為什麼人們沒有把他們的想像力延伸到另一個方面呢?人們如果會將政治看成麻煩事的話,那麼專制君主必然也是如此。當他也對政治感到厭煩,濫用他所被賦與的無限制的權力來滿足他個人的私慾時,人民該當如何?權力還是應該要受到限制、批判和監視的,因此就本質而言,民主政治應該比專制政治來得正確。」

只要你將政治睇成係自身嘅一種責任,你就會明白厭惡呢樣嘢係人之常情,事實上有邊個會鍾意將麻煩嘅責任攬上身?雖然好麻煩同討厭,但責任始終係責任,明白這道理後便會欣然接受要關心同討論呢樣嘢。(小弟今時今日心入面仍然討厭政治,但唔會因為咁就唔理或唔關心)

PS:政治中立=/=無視政治或政治冷感,兩樣嘢嚟,唔好拉埋一齊講。持中立立場,係唔應該,亦唔會阻到你發表睇法或參與討論嘅。另外關心政治亦唔等於上綱上線,二分化逼人歸邊。個人認為如果你想話人上綱上線,將話題扯得太遠或完全唔相關,正確應該係指出人哋離題或問題喺邊,而唔係用「唔好政治化」嚟反駁。


乜嘢係民主?繁榮安定先係最重要?

另一樣小弟想講嘅係民主嘅概念。可能因為始終本身源自強國,受文化歷史背景同教育制度影響,被統治殖民太耐,習慣做開純經濟動物,個人覺得香港人其實一直以嚟冇認真了解過乜嘢先係民主,討論好多時只留喺選舉制度到。雖然口就講追求民主,但個人感覺其實大部分人真正追求嘅只係想番去舊時80-90年代或曾蔭權,嗰種表面上繁榮安定,可以不問世事嘅生活,追求嘅係一個明君多於真正嘅想自己作主。

民主嘅真正精髓係人民先係主人,而唔係選賢揀「主人」……前者同後者心態上有明顯嘅分別。前者人民先係明正言順嘅老闆,政府、政客只係管家或代言人,冇需要對佢哋忠誠;係人民影響、主導政客,而唔係反過嚟被政客主導。相反,後者呢類「揀個冇咁差」、「有得揀好過冇得揀」嘅睇法,其實背後仲係暗示𡁵唔想煩,希望被主導,期望有明君或神去領導同管理自己;後者先會有需要討好政權,做順民嘅理由。

就算去到今日有本土派,出現咗反送中,唔少人認清係制度出現問題,追求繁榮安定多過民主好似仍然係主流。呢種睇法唔難理解,始終民主太抽象,而繁榮安定就直接易明好多,尤其對經濟動物嘅香港人嚟講。不過放棄追求真正自己作主,去換取表面上(短暫)嘅繁榮安定,小弟就唔太認同。正如小弟之前講,政治係社會入面每個人嘅一種責任。唔追求真.民主,追求真正自己作主,只係想要一種可以放棄思考、逃避社會責任嘅安定生活,係唔會長治久安嘅,今時今日嘅香港相信就係最好嘅寫照。


總結:就算你討厭政治,政治始終有一日會搵上門

最後喺完之前,有見近日動物森友會遊戲盛行,等小弟分享一部同動物有關,George Orwell嘅名作 🙂

今次講到呢到,下次應該會講番物理學。


延伸閱讀:

[1]《你討厭政治,那你喜歡權術嗎?》by Cheng Lap

[2] 《我討厭政治,也討厭小強》

1 thought on “[我討厭政治(?)]淺談小弟對香港人政治觀念嘅睇法

  1. Pingback: [說文解字] [政治正確系列] 《乜嘢係「中立」?》 | 論盡物理宇宙 – 某80後物理學博士的科普blog

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.