[非物理系列][衝定唔衝]談戰略同戰術嘅分別

小弟嘅blog從來只會同大家暢談物理學,但今次想破例講講政治。溫馨提示:如果你係「只談風月/物理,不談政治」嘅「人」*,請click上一頁離開。

*政治其實就係生活、風月。你唔關心政治,但政治卻時刻喺到關心、影響𡁵你⋯


勇武派嘅興起

經過咁多年來喺民主運動停滯不前,甚至逐年倒退後,由14年雨傘運動開始,香港人抗爭運動終於開辟咗「和理非」以外嘅勇武手段。除左議會抗爭同「今天我」和平遊行外,多咗佔領馬路同衝擊哩啲抗爭手法。去到今日,經過咗雨傘運動失敗、魚蛋「騷亂」嘅洗禮後,香港人終於喺今次「反送中」抗爭中認清咗中共、港共政府一早就已經無視民意。明白咗單靠傳統嘅「和理非」手段唔再可行,開始逐漸接受同認同佔路、衝擊嘅勇武手段。

不分化,堅持訴求,對準暴政

作為曾經發夢幻想參與過雨傘運動嘅一份子,小弟對今次「反送中」抗爭其實唔睇好,尤其最初六月「暴動」爆發前。除左因為上次雨傘運動失敗後灰咗,香港人好似已經放棄、接受咗命運外,更多係因為見到唔同派別,尤其「和理非」同勇武派內鬨,互相割蓆、指責。

不過事實發展有啲出乎意料之外,企出嚟支持「反送中」抗爭嘅人數遠比03年時反23條多,甚至接近64時嘅人數,抗爭運動仲一直持續到今日。不過更令小弟興幸,係抗爭運動(暫時?)堅持到將焦點集中番喺暴政同訴求度。「和理非」同勇武兩派終於少咗割蓆,終於講得出「兄弟爬山,各自努力」哩類說話,包括泛民在內。


「衝定唔衝」嘅迷思

雖然係咁,坊間大部分討論嘅行動焦點仍然集中喺「衝定唔衝」、衝擊邊度、乜嘢時機衝哩類片面嘅戰術層面上,尤其係71衝入立法會嗰日。無錯,哩啲嘢係有需要討論同思考,尤其係身處前線嘅抗爭者。不過哩類前線行動嘅決定,又係唔係好似某(大?)部分人所諗咁舉足輕重,足以顛覆社會輿論,影響成個運動嘅成敗呢?

簡單答案:唔會

事實上所謂道德高地、輿論戰未必真係咁重要。民眾好多時候只係「勝利球迷」,只係會支持有贏面嘅一方,尤其嗰班中產、唔太重視原則嘅(大多數)中間派。71立法會嘅事件亦證明咗只要「門面工夫」做得好,民眾腦海中留下嘅只會係「保護文明」、小妹妹(?)嘅一句「一齊走」、抗爭者喺塗黑嘅區徽同雨傘掩護下撕毀基本法等有象徵意義或打動人心嘅畫面,而唔係衝擊嘅一刻。

另外就如小弟上面嘅用詞,包括所有不合作運動在內,哩類行動同決定只係屬戰術層面。佢哋最多只能夠帶來契機,觸發出突破口,但唔會足以改變到整個戰略大局。今次「反送中」同近年香港嘅問題根源,一切其實都係源自「一國(兩制?)」,中共獨裁政權本身唔容許民主、自由、人權等普世價值嘅事實。就算基本法同門面上講兩制、自治,中共本質上根本就唔會容許香港一直維持現狀,會想辦法同化香港係必然嘅事實。

港共政權只係傀儡,中共先係大佬哩個相信唔少人都知。所以一日中共獨裁政權仍然維持強勢,仍然統治住香港,保皇黨、暴政仍然會佔有戰略主導權,所有抗爭運動只會處於被動嘅弱勢。香港嘅核心價值、自由只會繼續被蠶食,貪污腐化只會變本加厲。一條惡法或一個大白象工程暫緩或推倒後,又會換個名義或方法再推過,而且仲有其他惡法一條又一條,鋪天蓋地咁跟住嚟。


戰略>戰術

所以處於戰略上嘅絕對劣勢先係大問題,「衝定唔衝」哩類迷思同民意只係其次。點樣喺戰略層面上改變劣勢先係更加值得討論、研究,更加需要花時間同出力去做。個人覺得唔少香港人、抗爭者好似仲未睇清楚哩個局勢,冇乜大局觀(或者佢哋其實知,只係因為要改變大局太難,所以扮睇唔到)。

小弟嘅政治啟蒙小說《銀河英雄傳說》入面有一句講得好好:

「所謂的勝敗,是取決於戰場之外的。戰術終究只是對戰略的完成做技術性的輔助而已。若戰略條件做了萬全的準備之後,叫呆子來也能獲勝。」

事實上我哋可以睇到保皇黨、港共政權佢哋嘅官員當中周不時都有豬隊友出現,成日講錯嘢或做出錯誤決定。由偷步買車到「等埋發叔」事件,再去到今日最新「元秋」扮市民撐自己但唔記得轉account[1],真係多不勝數。

戰略成敗決定一切

不過事實上哩啲錯誤同膠嘢有冇動搖到港共政府嘅威權統治,影響到保皇黨議席?答案係冇。因為有強勢嘅中共喺背後,港共政權仍然手握絕對主導地位,仍然係贏面大嘅一方。商家、藍絲同所謂嘅中間派對哩啲嘢只會不為所動。

所以總結係要抗爭成功,甚至真真正正咁改變現狀,需要討論嘅唔係「衝定唔衝」、點打本土輿論戰,而係點樣能夠確實改變戰略大局形勢。今次「反送中」運動真·勾結外國勢力,借G20峰會、中美貿易戰做勢,爭取國際輿論同關注,其實算係第一次真正有從戰略大局落手(雖然只係做到哩一步,距離真真正正能夠爭取到外國介入,或改變整個形勢仲差好遠)。


最後送首《高登音樂台》二次創作歌《別死》作結,願各位抗爭者唔好再以死明志或以死相諫。


Source:

[1] from 蔣麗雲議員FB page,https://scontent.fhkg4-1.fna.fbcdn.net/v/t1.0-9/66613769_1378128628991676_7440162831724445696_n.png?_nc_cat=101&_nc_oc=AQm63_HI1wvNr9R_C_nLMaJnFAO0lKkqXAy-Zac4mB70dC1f-E9bhP_WDYGOVZ5dm3I&_nc_ht=scontent.fhkg4-1.fna&oh=0f052ad49e383ba58b6b78bbf255b83f&oe=5DBE65ED

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.