[罕有沒“標題黨”嘅認真文] 論科普和學術推廣 (Some personal comments on popular science)

小弟做咗「標題黨」(?)咁耐,唔少人應該都畀小弟嘅標題「呃」過,click咗入去睇小弟嘅拙文,最後仲睇到一頭霧水,心入面應該想打小弟好耐,好似係(?)有見及此,今次小弟嚴肅認真番一次,講講小弟喺心入面對學術推廣/科普、坊間某啲科普做法同大眾點睇科普嘅一啲個人睇法。PS: 寫一篇科普文去討論科普,唔知點解感覺有啲好似搞公投去決定要唔要公投咁,總覺得有啲怪咁…(笑)

(其實小弟自問每次拙文標題都好貼題,真心覺得小弟=標題黨嘅未免有啲太冇幽默感啩)


學術推廣/科普嘅重要性

雖然人人都話「知識就是力量」、「知識改變命運」,個個(香港)阿媽都教細路要努力讀書,但事實上現實有幾多人真心咁樣諗,離開咗校園後仲會有興趣了解一下專科知識呢?唔好話學新知識,香港人連中學、大學學過嘅嘢考完試後都即刻還番晒畀老師啦…

一般香港普羅大眾平日通常只係會關心好似「安心之亂」哩啲花邊娛樂新聞,睇吓體育賽事、追吓Marvel電影,至多發生「送中」時忽然關心一下政治、國家議題。學術研究、科學新知從來都唔會係主流大眾有興趣嘅嘢,尤其喺香港哩個過份功利嘅社會。好似最近物理學界黑洞「處女寫真」嘅大新聞[1],某啲香港人第一句只係會問「有咩用?可以用嚟賺錢?」咁…


作為學術界(曾經)嘅一份子,小弟當然唔太鍾意見到哩個現象。小弟不嬲唔認同學術議題、科學知識係應該只留喺大學象牙塔入面,搞學術先需要認識嘅嘢,更何況學術研究係推動人類文明進步嘅主要原因。試諗吓冇咗班古希臘哲學佬「9噏」,冇咗物理學家研究量子力學同相對論,你諗今時今日仲會有真·民主嘅概念,睇得穿強國同港共嘅假民主把戲,仲會有手提電話同GPS用?

身為人類文明嘅一份子,某程度上係有責任認識*吓學術議題同科學新知去了解一下人類社會嘅發展同文明未來嘅走向,更何況絕大部分大學嘅開支、研究經費你作為納稅人都有份出。唔通學術佬走去做好似「食早餐高分啲」嗰類垃圾研究嘥納稅人錢,或者好似賀XX無視龐大風險同倫理問題[2]去搞基改BB咁你都唔理?而且知道一啲正確嘅知識同學習學術精神,亦可以避免誤入動物傳心師、生物共振、盲搶鹽哩啲呃人陷阱。

*認識同關注=/=要你識晒或去搞學術,兩樣嘢係有分別嘅

所以小弟絕對認為搞學術嘅係應該出一份力去宣傳自己嘅學科,去啟蒙下一代同普羅大眾,唔好淨係留喺大學象牙塔入面不問世事,圍爐取暖。更何況納稅人同大眾係有權知道同監管你做嘅學術研究?


不負責任、「博出位」嘅學術推廣/科普? 

雖然小弟好支持同欣賞學術界同儕或其他人肯花時間做學術推廣,不過對過份明星化同某啲做法頗有微言。搞學術推廣或科普同教育/搞學術一樣,係要有學術操守,應該誠實地表明自己對講解嘅課題有幾多認識,唔好為咗滿足讀者/觀眾,走去過份解讀同講解時涉獵太多自己唔太明白、唔熟識嘅領域,尤其喺人人都可以係KOL嘅哩個年代。唔熟識課題,但又過份解讀或唔先去認真做功課,令自己搞清楚明白就隨便咁講解係不負責任嘅行為,同教壞人、傳播錯誤訊息冇分別,做成嘅壞影響亦可以好大,尤其當你有啲知名度同一定影響力嘅時候。極端嘅例子就好似你唔識量子力學但又走去講量子糾纏,講解錯當中嘅概念,結果係反而有機會令社會出現更多量子磁鐵、動物傳心哩啲偽科學嘢。所以正如小弟平時科普都只會講自己熟識嘅宇宙學同理論物理學,好少講解其他自己唔認識嘅課題,就算係物理學嘢都好。


事實上就算係教書或學術佬,做學術推廣時或多或少都有哩個問題,始終搞學術推廣或科普帶來嘅知名度同虛榮感可以好大,令人上咗腦唔記得學術操守。就好似著名科普人同理論物理學家加來道雄(Michio Kaku)咁,無錯佢係教授,曾經喺弦論領域研究有一定嘅貢獻,但自從佢全職搞科普之後其實已經同近年最新嘅前沿物理學研究脫咗節,試過喺電視節目亂咁講解「上帝粒子」—希格斯粒子[3]。而且唔知係咪為咗「博出位」吸引觀眾同讀者,佢仲成日將一啲未經驗證嘅假說理論或甚至係似是而非或錯誤嘅概念講到係真嘅一樣,連去科幻世界啲FF嘢到,吹水吹到話科幻小說入面嘅嘢將來都會一一實現到,模糊咗科幻同嚴謹科學中間嘅界線[4]。

(其實就算霍金都有少少哩個問題,好似佢做科普時成日將自己提出同相信嘅「時間喺大爆炸前唔存在」哩個假說理論講成係已被驗證嘅真理,明明理論物理學界都仲未有定論…)

始終普羅大眾一般唔會對你講解嘅課題同學術領域有深入嘅認識,好容易就會當咗你係領域嘅權威或專家,盲目相信你講嘅所有嘢,甚至吹捧你、幫你「做神」成為知名人士。

PS: 小弟當年仲係中學雞嘅時候亦曾經以為加來道雄或確斯(Brian Cox)係物理學界嘅明日之星,甚至係下一位愛因斯坦。不過事實係佢哋其實只係著名科普物理學家,好耐冇主力做研究工作,講唔上係物理學界舉足輕重嘅人物


學術推廣=/=教書,唔係學習知識嘅捷徑

另一樣小弟想講嘅係,個人認為一般普羅大眾看待學術推廣/科普嘅錯誤觀念。冇錯,同一般沉悶嘅教科書同學術論文唔同,學術推廣或科普嘅文章/節目通常會比較生動有趣,而且門檻唔高,會用好多比喻同簡化手法令人比較容易有興趣睇落去。不過咁唔代表佢哋係學習知識嘅捷徑,你可以用佢哋嚟取代教科書或傳統課堂。睇完哩類文章或節目就以為自己真係學識或完全明白文章講嘅課題,哩個其實係好錯嘅觀念嚟,同以為自己花幾個鐘上完Google大神嘅堂就會變成專家一樣咁天真。學術普及嘅角色應該係啟蒙同帶大眾進入學術領域嘅一道門,個人唔太認同將重點放喺教導知識方面。

學習係冇捷徑嘅,唔應該抱住睇完就會完全明白嘅期望去睇學術普及文章/節目。如果對課題真係好有興趣,想認識同明白多啲,正確嘅做法係應該去搵教科書同講義去認真睇。小弟寫科普文嘅出發點不嬲都係為咗引起大家嘅關注同興趣,等大家有個大概認識,啟蒙同刺激大家思考,培養大家嘅學術精神,給大家一個大概嘅故事圖像;唔會盲目追求follower數目或抱住好似教書咁嘅心態去寫,亦唔會強求大家完全睇得明,尤其係嗰啲高深嘅物理學課題(當然更多係因為小弟深明自己講解得唔好,好似係)。


記住睇小弟拙文或其他學術普及文嘅時候,唔好照單全收,似懂非懂咁睇完就當明咗;同時亦應積極參與討論同提問。另外亦唔好盲目吹捧同「做神」,應該同時參考其他相關文章,可以嘅話睇文章前亦應該先行去了解作者嘅背景,評估一下作者對嗰個課題有幾多認識同文章嘅可靠程度。


最後完結前,等小弟分享一下《直角等於三角形》哩首歌,用入面「立說著書 便算位專家顧問」一句歌詞總結個人嘅睇法。

今次講到哩度,下次再講。


延伸閱讀:

[1] 《First Image of a Black Hole!》by Veritasium (中文字幕)

[2] 北歐心科學 NordicHearts 對基改BB事件嘅高汁評論

[3] 《Why, Professor Kaku? Why?》by Matt Strassler 

《What “The God Particle” Hath Wrought》by Sean Carroll

[4] https://www.quora.com/What-do-physicists-think-of-Michio-Kaku

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.